Mult ben i fierent Franceis e Arrabit ;
Fruissent cil hanste se cil espiez furbit.
Ki dunc veïst cez escuz si malmis,
Cez blancs osbercs ki dunc oïst fremir,
E cez escuz sur cez helmes cruisir,
Cez chevalers ki dunc veïst caïr
E humes braire, contre tere murir,
De grant dulor li poüst suvenir !
Ceste bataille est mult fort a suffrir.
Li amiralz recleimet Apolin
E Tervagan e Mahumet altresi :
« Mi Damnedeu, jo vos ai mult servit !
Tutes tes ymagenes ferai d’or fin. »
AOI
. . . . . . . . . . .. . . . . . . . . . .. . . . . . . . . . .
As li devant un soen drut, Gemalfin.
Males nuveles li aportet e dit :
« Baligant, sire, mal este oi baillit.
Perdut avez Malpramis vostre fils,
E Canabeus, vostre frere, est ocis.
A dous Franceis belement en avint.
Li empereres en est l’uns, ço m’est vis :
Granz ad le cors, ben resenblet marchis ;
Blanc[he] ad la barbe cume flur en avrill. »
Li amiralz en ad le helme enclin,
E en apres sin enbrunket sun vis :
Si grant doel ad sempres quiad murir.
Sin apelat Jangleu l’Ultremarin.